FreeAcheh.info
The Preparatory Committee of the Free Acheh Democratic
|
|
|
Komité Peukeumah Atjeh Merdehka Demokratik
Komite Persiapan Acheh Merdeka Demokratik
Preparatory Committee of the Free Acheh Democratic
Sekretariat:
Kutaradja, Atjeh
New York, Amirika Sjarikat
Stockholm, Skandinavia
committee@freeacheh .info www.freeacheh. info
AMANAT KOMITE BAK UROË PEU-INGAT ULANG THÖN ATJÈH MEURDÉHKA NJANG KEU-32
HÄLLEFORS, 4 DESEMBER, 2008
Assalamulaikum Warahmatullahi Wabarakatuh
Alhamdulillahir Rabbil 'Alamiin, Wal'aqibatu Lilmuttaqiin, Wash shalaatu Wassalaamu 'Ala Asjrafil Ambijaa-i Walmursaliin, Wa 'ala Alihi Washahbihi Adjma'iin.
Meuhubông deungon ulang thôn 4 Desember njoë, kamoë dari Komite Atjèh Meurdéhka Demokratik, kamoë peutrok saleuëm seudjahtra dan dô'a seulamat keu bandum bansa kamoë njang that kamoë gaséh pat mantong ateueh rhuëng dônja njoë. Kamoë peutrok tjit rasa simpati kamoë keu bandum ahli waréh nibak sjuhada2 njang ka neuwoë bak Po teuh Allah bak neupeutheun dèëlat nanggroë dan bandera pusaka endatu.
Dalam proses saboh2 peurdjuangan keumeurdéhkaan memang le that keusulétan dan halangan2 njang ta teumeung. Saboh nibak rintangan2 njang paléng rajek njang teungoh geutanjoë hadapi dalam padum2 thôn njoë nakeuh nakhoda Behtra (bahtera) njang ba geutanjoë bak meurdéhka, njang geutanjoë meunumpang seulama njoë, ka djibadjak uléh padum2 droë ureuëng Atjèh di Helsinki. Behtra njang teungoh intat geutanjoë bak tudjuan keuneulheuëh, ka djitamong ie u dalam, ka tiréh rajek, sabab na padum2 droë peunumpang njang peugot sabotase. Djinoë kadjeuët keu tugaih geutanjoë bandum njang mantong meuseutia keu peurdjuangan, supaja saban-saban taboih ië dalam behtra bunoë mangat leubèh bagah djidjak lom dan bagah trôk bak tudjuan teuh. Geutanjoe musti ta jakin bahwa bansa geutanjoë akan keumah lingkeuë bandum halangan njan.
Situasi semasa
Bansa Atjèh njang that teugaséh,
Dalam sithôn njoë, le that hai njang ka teudjadi di nanggroë: na njang meu-untông keu peurdjuangan dan le tjit peukara njang peurugoë peurdjuangan bansa Atjèh bak peuteuntèë nasib droë, ateuëh nanggroë droë-teuh, njang ka meurutôh thôn geukeubah uléh éndatu.
Saboh hai njang positif njang ka teudjadi di nanggroë dalam sithôn njoë nakeuh le that rakjat Atjèh djinoë njang ka muphôm dan mulai sadar bahwa geutanjoë ka keunong peungeut lom buët peundjadjah Indonesia, njang keu siribèë go. Lheuëh lhèë thôn tèkèn-meunèkèn, bansa geutanjoë njang seugohlom njoë geujakin bahwa peurdjandjian Helsinki njan saboh rahmat Tuhan untôk bansa Atjèh (rahmatan lil-Asyiyyiin) , djinoë ka meutuka kadjeuët keu saboh laknat. Paragraf2 MoU ka djingui lé pihak2 njang teulibat untôk mita pangkat atawa kuasa meulalui pilkada dan peureuté lokal, untôk peukaja droë meulalui korupsi atawa djatah pareman, dan hana meubatjut pih na untông keu rakjat biasa.
Seulaén njang positif bunoë, memang le that tjit njang hana djroh njang teudjadi di nanggroë dalam thôn njoë. Tragedi di Atu Lintang, Takengon, bak buleuën Maret, njang djipeulaku uléh anggèëta milisi sipai ateuëh nam droë anggèëta KPA; meuplôh-plôh boh Posko TNI njang ka djipeudong di wilajah2 Atjèh Timu, Atjèh rot Barôh dan Atjèh Teungoh, ditamah lom deungon padum2 boh battalion baro TNI ngon brimob; operasi2 gabôngan polisi-TNI untôk djak mita seundjata ilegal; buët temeutôt dan rhom boh granat bak kantô2 peureuté lokal; intimidasi, drop dan poh ureuëng diluwa hukôm, lagèë njang djipeulaku ateuëh beukaih panglima GAM dan keutuha umum Partai Aceh Wilajah Peureulak, Teungku Sanusi, dan Ridwan Abubakar atawa Nektu, beukaih panglima operasi Wilajah Peureulak. Meunjo beukaih peumimpin2 GAM lagèë Teungku Sanusi dan Ridwan Abubakar njang ka meunjeurah dan meusumpah seutia deungon RI djitém peulaku lagèë njan rupa, djidrop-djitampa- tampa, pakriban deungon nasib GAM-GAM biasa njang laén dan rakjat Atjèh umum djih di masa ukeuë?
Saboh hai treuk njang meunarék tameutjeukot disinoë nakeuh peukara PASÔKAN SILUMAN, saboh pasôkan njang djibina uléh badan intelidjen RI njang ka djikirém u Atjèh lheuëh peutreun djaroë di Helsinki. Pasôkan njoë hana kajém "beraksi", tapi dalam thôn njoë na peudeuh droë lhèë go ka: sigo di Wilajah Peureulak, watèë djipeusapat ureuëng gampông djiélanja deungon hana sabab sapeuë, watèë djimeu-amok di kantô KPA di Lamdingin akhé-akhé njoë dan sigo treuk watèë djiadjak tjuë dokumen peunténg di kantô 3P, di Simpang Limong, Kutaradja.
Lagèë ka geutanjoë teupeuë, uroenjoë teungoh djipeudjak operasi Paremanisme di Atjèh. Soë mantong njang djitjuriga na hi pareman batjut, ladju djibeureukah dan djiba u kanto. Seulama operasi njoë, meurutôh rakjat Atjèh njang hana salah ka djidrop, dan meuplôh-plôh njang gohlom meuteuntèë salah kadjitheun. Djadi dalam operasi njoë, njang peuteuntèë sidroë-droë ureuëng salah, kon peungadilan atawa madjeulih hakim, teutapi polisi atawa teuntra. Sidroë peungamat politék Atjèh dan direktur LSM Pusat Peukong Perdamaian (3P), Fachrul Razi, geukritik atawa geupeusalah operasi njang teungoh djipeulaku di nanggroë djinoë, njang djipasoë dalam surathaba Harian Aceh uroë 18 November. Meunurôt gobnjan, operasi njang teungoh dhipeudjak njoë pajah na saboh badan njang kontrol dan harôih na persetudjuan nibak badan2 eksekutif (gubernur) dan legislatif (anggèëta Dewan), meukon meunan akan teudjadi seumeudrop lagee meuneuheut droe (sewenang-wenang) ateuëh ureuëng2 hana salah dan kekuasan polisi ka hana le bataih. Meunurôt gobnjan lom, operasi2 lagèënjan kalheueh djipeugot bak masa Suharto dilèë, thôn 1998, keuneulheuëh sasaran djih kon lé ateuëh pareman teutapi ateuëh mahasiswa2 njang kajém demonstrasi. Djadi, tudjuan operasi njoë untôk peutakôt rakjat supaja bèk na soë protèh atawa peuë njang djipeulaku uléh polisi dan militè di Atjèh.
Kira2 sigo minggu leubèh lheuëh Fakhrul Razi geukritik operasi njan, bak uroë 27 November (Harian Serambi) pasôkan siluman intelidjen RI ka djiteuka u kanto Pusat Peukong Dame (3P) poh 2 teungoh malam. Lheuëh djitjok bandum dokumen peunténg lagèë kamera, kumputer, kaset2 dokumen peukara data-data kekerasan dan kriminal seudjak thôn 1977 dan djisinteueng peue2 njang na disinan.
Dua boh komponen rajek nibak bansa Atjèh, GAM dan SIRA njang uleh sibagian bansa Atjèh ka teulandjô geupeutjaja djeuët keu waki geuh untôk peudjak MoU Helsinki, teunjata bandua komponen njan djinoë ka lumôh total dan hana mupat le. Watèë pihak RI djilangga paseuë-paseuë dan bab demi bab dalam MoU, bèk treuk tapeugah keumah djidjak peuseuleusoë deungon Djakareuta, meudjiprotèh pih han djikeudjuët lé. Njang ka na pangkat gubernur/waki, bupati/waki, wali kuta/waki dan laén2 lom, djinoë teungoh djipeutimang- timang neuduëknjan supaja keukai. Seudangkan njang gohlom meurumpok sapeuë, djinoe teungoh gabuëk bak mita atranjan meulalui Peureuté Lokal. Awaknjan hana djiteumeung pakoë lé peukara keupenténgan rakjat dan awaknjan hana narit meusikrèk lé ateuëh tingkah laku biadab peulisi dan TNI di Atjèh.
Peukara wali woë
Di antara peuristiwa2 njang teudjadi dalam thôn njoë njang tjukôp meunarék got pih di nanggroë dan di luwa nanggroë nakeuh peukara keumah djipuwoë Wali Neugara, Tengku Hasan Mumahammad di Tiro, djak saweuë gampông bak uroë 11 Oktober, 2008. Wali woë u nanggroë memang that geuharap-harap uléh bansa Atjèh, sabab, seulaén geukeuneuk kalon langsông rupa droëneuhnjan, bangsa Atjèh geukeumeung deungo tjit dari babah Wali langsông peusan2 politék dan amanah dari peumimpin geuh njang seulama njoë geudeungo dari babah keu babah, mantong dan seulama 10 thôn njoë that djitôp-tôp uléh ureuëng2 njang toë deungon droëneuhnjan.
'Ohlheueh dua go Djumat di Atjèh, teunjata hana meusikrèk narit njang djitubiët nibak babah wali, bèk 'an takheun peusan atawa peuneutrang keu bansa Atjeh teuntang peurdjuangan njang ka leubèh lhèë plôh thôn ka djidjak. Peuë njang teudjadi lheuehnjan hana laén nibak propaganda, rekayasa dan sandiwara tjot uroë nibak keulompok njang seulama njoë dji hudép dan djimita raseuki ateuëh nan Wali. Le nibak bansa Atjeh hana geutupeuë bahwa propaganda dan sandiwara kelompok njan ka djipeudjak ka leubèh siploh thôn, seudjak Wali Neugara keunong stroke bak pertengahan thôn 1997. Teutapi peukateuën njan bandum keumah djitôp deungon rapat that kareuna awaknjan le that djingui sarông djaroë ban saboh Atjèh.
Alhamdulillah, Wali ka trôk neudjak saweuë gampông dan bansa Atjèh kalheuëh geudeungo dan geukalon keudroë deungon mata ulèë pakriban keuadaan dan kondisi Wali njang seubutôi djih - djuôh that nibak peuë njang ka djipeurupaganda baroëkon. Dan kamoë jakin bahwa bansa Atjèh uroë njoë ka muphôm that dalam peukara njan. Seudangkan anggèëta Komité tinggai toë2 deungon Wali disinoe, njang tepeuë keuadaan Wali njang beutôi, ka meuthôn-thôn geu brithee u nanggroë bahwa peuë njang teudjadi di luwa nanggroë seulama njoë, hana rôh Wali, kon buët Wali dan di luwa keumampuan droëneuhnjan. Allah kalheuëh neumeudjandji bahwa buët njang bateuë, keuneulheuëh hantjo bandum: Qul Dja Al Haaqqu Wadhahakal baathil. Innal bathilaka nazahuka.
Mungken tjit na sibagian bansa Atjèh njang seumike bahwa deungon ka neuwoë Wali u Atjèh, peuë lom trôk u Beutawi djidjak peumeurumpok deungon djén rajek disidéh, maka peurdjuangan Atjèh meurdéhka ka rasmi habéh. Peureulèë kamoë peutrang disinoë bahwa peurdjuangan keumeurdéhkaan saboh2 bansa hana habéh peuë mantong njang teudjadi ateuëh peumimpin bansa njan. Peuë lom geutanjoë teupeuë bahwa Wali hana neutèken saboh surat meunjeurah deungon musôh. Bèk neutèkèn surat meunjeurah, meu neudjak hana dalam peurundéngan Helsinki.
Saboh tjunto seudjarah Atjèh njang tjeudaih lagèëna nakeuh, seudjak djameun Beulanda kon sampé uroë njoë, hana sidroë peumimpin thjik Atjèh njang na rôh djak meujeurah bak musôh. Meunan bak masa Beulanda dilèë, meunan watèë DI-TII thôn limongplôhan , dan meunantjit watèë GAM banban njoë. Tjut Njak Dhien hana neumeunjeurah keu Beulanda, tapi djkhianat uléh ureuëng2 njang na sadjan, watèë droëneuhnjan han deuh neukalon sapeuë lé; Abu Beureuéh han neumeunjeurah watèë Iqrar Lamteh djitèkèn thôn 1957, teutapi neutren u gampông limong thôn lheuëhnjan kareuna ka djikhianat uléh ureuëng2 njang droëneuh peutjaja njan; Wali Neugara, Njang Mulia Tengku Hasan Muhammad di Tiro, hana neuwoë u nanggroë lheuëh meutèkèn MoU Helsinki thôn 2005, tapi ka djikhianat uléh ureuëng2 sadjan droë-neuh dan ka keumah djipuwoë u nanggroë lhèë thôn siteungoh lheuëhnjan, watèë droëneuhnjan handjeuët neubila droëneuh lé dan handjeuët neumarit lé dalam basa Atjèh.
Keusimpôlan djih: keudjadian ateuëh Wali bak uroë 11 Oktober 2008, saban that lagèë keudjadian ateuëh Tjut Njak Dhiën watee dikhianat uleh Pang Laôt.
Djadi seudjarah sabé meu-ulang dan peurdjuangan untôk peuteuntèë nasib droë teutap meusambông, hana peungarôh peuë njang akan teudjadi ateuëh peumimpin peurdjuangan njan. Bansa Islam Chechenia njang ka 300 thôn geulawan Rusia, dalam masa 10 thôn njoë 4 droë presiden awaknjan ka sjahid meuturôt-turôt dalam mideuën prang: Presiden Dzhokhar Dudayev, Zelimkhan Yandarbiyev, Aslan Maskhadov dan Abdul-Khalim Sudalayev. Maté saboh meugantoé saboh, namun peurdjuangan awaknjan hana meusurôt meusilangkah. Meunan keu njang akan teudjadi di Atjèh ukeuë, Insja Allah.
Peukara Parlok
Peukara laén lom njang teungoh peusewe bansa di nanggroë uroenjoë nakeuh peukara Parlok, peureuté lokal. Peukara njoë sibutôidjih kalheuëh upeutrang keu bansa Atjèh uléh sdr Eddy Suheri dalam saboh VCD, tapi peureulèë tjit kamoë ulang lom supaja bansa kamoë bèk tuwo dan bèk keunong tipèë diateuëh tipèë sabé: phon, keunong nuga MoU; kedua, keunong balu ngon UUPA; keulhèë sandiwara Pilkada; keu peuët, péasan Parlok, peureuté lokal, atawa peureuté njang akan tamong dalam lokap sigo treuk. Djinoë ka na peuët boh instrument njang meu-asai dari Helsinki untôk peungeut, peulalé dan peutuwo bansa Atjèh keu peurdjuangan geuh dan keu hak geuh ateuëh tanoh Atjèh. Ukeuë peuë djeueneh pèng grik njang akan djirô lom meuguni-guni u Atjeh supaja bansa Atjèh mangat geumeujeuh, geumeutak-tak saré keudroe bak geumeuseunoh- sunoh atranjan, lagèë njang teungohn teudjadi di Atjèh uroë njoë? Seudangkan biek peundjajah teungoh dikuran ladju hase nibak bumoe geutanjoe njang kaja leupah na.
Kamoë kaleuëh meupeugah dan uroenjoë kamoë peugah lom tjit bahwa Peureuté Lokal njan hana makna sapeuë keu bansa Atjèh. Soë2 njang meunang peureuté lokalnjan akan meuteumèë padum2 boh kurusi dan djibri gadji 1-2 djuta sibeuleuën. Bèk treuk geukeuneuk peuseudjahtra rakjat Atjèh, meukeu aneuk peurumoh geuh han ék geubri bu. Peureuté lokalnjan kon saboh alat untôk tapeudjuang keumeurdéhkaan atawa referendum, sabab njan saboh sistem politék Indonesia njang hana keumah peugot sapeuë meunjo hana izin dari pusat. Nan mantong parté lokal, untôk urôih peukara2 lokal njang kalheuëh djipeuputôh uléh Djakareuta, untôk bagi atawa weuëk-weuëk budget daerah njang kalheuëh djipeunteuntèë uléh Djakarta padum djikeuneuk bri. Njan keuh sabab mantong le pungo keu peureuté lokal, sabab djeuët bagi2 pèng euntreuk. Tapi meunjo peuë djeunèh operasi militè njang akan djipeudjak di Atjèh euntreuk, Djakarta hana djidjak tanjong bak peureuté lokal gambugainjan. Meubak gubernur hana pajah djitanjong!
Peusan Komite
Bansa Atjèh njang kamoë peumulia!
Djinoë ka trang that deuh ta kalon deungon mata ulèë teuh bahwa peurdjandjian Helsinki nakeuh saboh tipèë muslihat puliték RI njang akan bri mudharat keu bansa Atjèh dan keu aneuk tjutjo bansa Atjèh ukeuë. Seudangkan pihak2 Atjèh njang teulibat keunan, njan mandum djipubuët untôk keupenténgan pribadi atawa keu keulompok awak droejih sagai, tapi kon untôk keuseudjahtraan rakjat Atjèh seutjara keuseuluruhan djih. Seudangkan masalah keuadélan, njan disinan rôh tjit peukara HAM, langsông hana meuteumeung peuratian meubatjutpih.
Seulaén nibaknjan, peurdjandjian Helsinki njan ka trang2 meulawan deungon sumpah peurdjuangan Atjèh Meurdéhka dan meulangga Proklamasi Atjèh Meurdéhka thôn 1976 sibagoë tamèh teumpat teudong dan teumpat rudjuk peurdjuangan geutanjoë. Ulèh sababnjan, Komité Atjèh Meurdéhka Demokratik, sibagoë saboh wadah peusaboh keulai bansa Atjèh untôk reubôt keulai hak2 bansa Atjèh, meuharap that bak bandum bansa Atjèh supaja beuteugoh-teugoh that deungon matjam-matjam sandiwara peundjadjah Indon di nanggroë uroë. Seulama 63 thôn geutanjoe dimijub RI, ka séb that le bukti bahwa biëk peundjadjah njan handjeuët ta meuseutia basa, handjeuët takeuridja sama dan handjeuët tapeutjaja meubatjut pih.
Wassalamualaikum Waramatullahi Wabarakatuh.
----------------------------------------------------
Siaran Pres Laen:
• Peunutôih Madjeulih Muwafakat Teuntang Neuduëk Komite dan Anggèta Barô
• Peundjeulasan Teuntang Partai Lokal di Atjèh
• Amanat Kumité Bak Uroë Peu-ingat Ulang Thôn Atjèh Meurdéhka keu-31
• Maklumat Ukeuë Bansa Atjèh
|
|
 |
| Search |
 |
Search Webs by Google
|
|
 |
|
|
|
|
| Quote |
|
|
|
"There is no easy walk to freedom anywhere and many of us will have to pass through the valley of the shadow of death again and again before we reach the mountain tops of our desire."
|
|
|
|
|
|
|
|
|
|
|
|
| World Time |
|
|
|
Acheh:
Australia:
Canada:
Egypt:
Houston:
Japan:
London:
Malaysia:
New York:
Scandinavia:
|
|
|
|
|
|
|
|
|
